Թուրքմենստանում ՀՀ դեսպանը հավատարմագրերը հանձնեց Թուրքմենստանի նախագահ Գուրբանգուլի Բերդիմուհամեդովին

13 դեկտեմբերի, 2018

Թուրքմենստանում ՀՀ նորանշանակ արտակարգ և լիազոր դեսպան Գառնիկ Բադալյանը դեկտեմբերի 13-ին հավատարմագրերը հանձնելու կապակցությամբ նախագահական «Օղուզխան» պալատում հանդիպել է Թուրքմենստանի նախագահ Գուրբանգուլի Բերդիմուհամեդովի (Gurbanguly Mälikgulyýewiç Berdimuhamedow) հետ: Շնորհավորելով Գառնիկ Բադալյանին Թուրքմենստանում Հայաստանի Հանրապետության դեսպան նշանակվելու կապակցությամբ՝ նախագահ Գ. Բերդիմուհամեդովը կարևորել է երկկողմ հարաբերությունների զարգացման անհրաժեշտությունը և նշել, որ նորանշանակ դեսպանին հետաքրքիր աշխատանք է սպասվում պատմական հարուստ անցյալ ունեցող Թուրքմենստանում: Նախագահը ողջունել է երկկողմ հարաբերությունների աշխուժացման ուղղությամբ կատարվելիք առաջիկա աշխատանքները և, կարևորելով Թուրքմենստան-Հայաստան միջկառավարական տնտեսական հանձնաժողովի աշխատանքը, հույս հայտնել, որ կողմերը կարագացնեն Աշխաբադում կայանալիք 9-րդ նիստի անցկացումը: Նախագահ Գ. Բերդիմուհամեդովը մաղթել է, որ նորանշանակ դեսպանն իր արգասաբեր գործունեությամբ նպաստի և նոր շունչ հաղորդի Հայաստանի և Թուրքմենստանի միջև ծավալված արդյունավետ փոխգործակցությանը։ Դեսպան Գ․ Բադալյանը Թուրքմենստանի նախագահին է փոխանցել ՀՀ նախագահ Արմեն Սարգսյանի և ՀՀ վարչապետի պաշտոնակատար Նիկոլ Փաշինյանի ողջույնները և հավաստիացրել, որ Հայաստանի և Թուրքմենստանի համագործակցության օրակարգն ընդլայնելու նպատակով իր պաշտոնավարման ընթացքում ջանք չի խնայելու երկու բարեկամ երկրների միջև առկա ջերմ հարաբերություններն էլ ավելի ամրապնդելու և զարգացնելու համար: Ողջունելով երկկողմ փոխգործակցության զարգացման ուղղությամբ ՀՀ նորանշանակ դեսպանի ծրագրերը` նախագահ Գուրբանգուլի Բերդիմուհամեդովը հաջողություններ է մաղթել դրանք առաքելության ընթացքում իրականացնելու համար։ Հանդիպման ավարտին դեսպան Գ․ Բադալյանը ՀՀ դեսպանության անունից ծաղիկներ է խոնարհել Թուրքմենստանի առաջին նախագահ Սապարմուրադ Նիյազովի անվան մզկիթում (Türkmenbaşy Ruhy Metjidi), պատասխանել Թուրքմենստանի պետական հեռուստատեսության և լրատվական գործակալության թղթակիցների հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր